كيكة قدرة قادر

بسم الله الرحمن الرحيم 

كيكة  قدرة  قادر

SARA HAMIDI

البنات اليوم جبت ليكم كيكة الي غادي تشكروني عليها
الي عارف وصفاتي عارفني كنجيب داكشي مجرب و كيصدق
كيكة اسمها : قدرة قادر
للاسف جربتها ودرتها فمول كيتحل من الجناب و دخل ليها الماء حيت هي كطيب ف حمام مريم و خسرات ولكن المذاااااااق رائع انتم تبعو الطريقة و ديروه فمول عادي الي متقوب من الوسط


اول حاجة نوجدو الكراميل

 كاس عنبة سكر
عصير نص حامضة
نديروه ف كاسرونة على عافية مهيلة مع التحريك بملعقة خشبية حتى يتغير اللون و يولي ذهبي و نخويوه مباشرة ف المول

المرحلة الثانية هي الكريم

2 كيسان نيدو (العبار ب العنبة)
2 كيسان ماء بارد
4 بيضات (فحرارة المطبخ)
1 كاس سكر سنيدة
عصير نص حامضة
و قشور حامضة صغيرة
نخلطو هاد المكونات كلها بطراب يدوي حتى تتجانس ونخويوه فوق الكراميل

المرحلة الثالثة و الي هي الكيكة

2 بيضات
كاس طحين
نص كاس زيت
كاس حليب سائل
3 معالق كبار كاكاو
كاس سكر سنيدة
فاني
1 خميرة الحلوة
نخلطو جميع المكونات و اخر حاجة هي الطحين و الخميرة و نخويوها فوق الكريم فشكل عشوائي و ماتخافوش منين غادي طيب الكيكة غادي تفصل على الكريم هادشي علاش سماوها (كيكة قدرة قادر)
ديروه ف حمام مريم و الفران يكون سخون قبل مدة الطهي 45 دقيقة و تدخل للثلاجة 6 ساعات 

بالصحة والراحة .